عارف ليه عمر ما بيجيلي قلب اخليك
تنام زعلان؟؟؟؟
عارف ليه حتي لو حصل مشكله بينا... وكنت
انت ايلي غلطان..بعديها ومش بقف عند المشكله
واكبرها؟؟
عشان الواحد مش ضامن هيعيش يوم تاني ولا لأ....
مش ضامنه اني اصحي بكره واصالحك....
الدنيا دي والله مش مستاهله الواحد يضايقه نفسه..
ويضايق ايلي حواليه...
الدنيا دي كلها متسواش نزعل من بعض...
عيش يومك وانبسط كأنه اخر يوم في عمرك...
عشان انت مش ضامن يطلع عليك نهار جديد...
والله لو كل واحد  اتعامل مع التاني علي انه احتمال
ميشوفوش تاني...هيبقي كل ايامنا حلوه وقلوبنا صافيه...
ولو موتنا هنموت مرتاحين...

الجو برد اوي

حسه اني الجو كئيب اوي من حواليا...
والحو برد اووووي....الشتاء ده ملل..
وكسل و برد وهدوء .. واكتر حاجه بكرهها
في الشتاء ..اني اقوم الصبح بدري  وانا متدفيه
عشان  عندي سكشن..او عشان ازاكر..بجد ببقي
حسه اني بمووت .. وببقي نفسي افضل نايمه
وانفض لكل ايلي ورايا...بس احسن حاجه بحبها
في الشتا.. والدنيا بتمطر... وامشي في وسط المطره
...واروح هدومي غرقانه... بس ببقي مستمتعه اووووي

ده هبل ده ولا ايه

انا نفسي مبقتش فاهمه نفسي... بجد مش فاهمه

هوا انت عاملي عمل... اصل انا عمري ما كنت

كده.... طول عمري قويه ومفتريه ... ومحدش يقدر 

يكلمني نص كلمه متعجبنيش؟؟؟... بجد حسه اني معاك

بتحول وببقي واحده تانيه خالص... مش بكون انا...

مش عارفه بجد.... مهما زعلتني وعملت فيا... بأقل 

كلمه بصالحك وبنسي وقلبي بيصفي ليك...ده حتي في 

وسط ما انا بزعق ومتعصبه... وانت  قمت قايلي انتي

عسوله اوي... لقيت نفسي بضحك زي العبيطه ونسيت

اني كنت بزعق اصلا.. .لالا انا بجد هبله

هبطل دلع بقي وهزاكر

خلاص بقي قررت اني هحاول ازاكر...مع ان ماليش
نفس خالص وحسه اني كبرت اصلا علي المزاكره..
بس بقي هبطلع دلع .. عشان اخلص بقي السنه دي
وابقي دكتوووووووره قد الدنيا كلهاااااا...

يااااارب ماليش غيرك

بجد مصدومه فوق ما تتخيل...اصل اكيد انا مش كنت
مخدوعه طول الوقت...يعني انا كنت عاميه يعني و
مبشوفش..انا اصلا مش مصدقه..ان ايلي بيحصل ده
منك انت...ما هو انا مش عارفاك من يومين..
طب هو انا يعني استاهل ده منك...مشكلتي اني بحبك..
اني  حياتي كلها انت...اني عمري ما توقعت حاجه
وحشه منك..اني عمري ما نيمتك زعلان... اني حتي
لما بتضايق مني بيكون مش بقصدي اصلا.....
ماليش غيرك يارب انت العالم بيا وبايلي جوايا

مش عارفه؟؟؟؟؟

مش عارفه اكتب ايه ولا اقول ايه.؟؟؟ بس كل ايلي حسه بيه اني
مخنوقه اوي... ومتضايقه اوي...
هوا انا فعلا  مقدرش اعيش من غيرك؟؟ ولا انا ايلي مجربتش ااصلا
مش عارفه ...مش عارفه انت تستاهل كل حاجه...ولا متستاهلش حاجه اصلا
مش عارفه ان كنت  انا فعلا بحبك ولا انا ايلي اقنعت نفسي اني بحبك؟؟؟
طب انت كمان بتحبني ولا ايه؟؟؟
مش عارفه ...ومش فاهمه... ومش عارفه افكر ولا اقرر ولا اعمل اي حاجه
هوا المشكله اني بحبك..وانت مش مقدر ده...ولا انت ايلي بتحبني وانا ايلي
مش مقدره؟؟؟
ولا المشكله اني بحبك شويه زياده... فاي حاجه بتعملها مش ببقي متوقعاها منك
هوا انا كنت فاكراك طيب ..ولا انتي طيب اصلا...طب انت جبت القسوه دي كلها منين؟؟؟
هوا انا فعلا كنت عايشه في وهم... وانصدمت بالواقع؟؟؟؟

ياااااااااارب

اللهم أنى أستودعت مصر..♥ رجالها و شبابها .♥ نساءها و فتياتها .♥. أطفالها و شيوخها .♥. اللهم أنى أستودعتك ممتلكاتها و مبانيها و منشآتها .♥. اللهم أنى أستودعتك نيلها و اراضيها و خيراتها .♥. اللهم أنى أستودعتك أمنها و أمانها و أرزاق اهلها .♥. اللهم أنى أستودعتك حدودها و بحورها و جنودها .♥. فأحفظهم بحفظك يا من لا تضيع عنده الودائع و أنت خير الحافظين .♥. اللهم احفظ احبابي وأهلي وأصحابي وجيراني اللهم امين يااااااااا رب

ربنا معاكي يا مصر

بجد ايلي بيحيصل ده شئ يستفز اي حد
صعب اوي ايلي بيحصل فيكي وفي
ولادك يا مصر..لا تعليق.

هوا ايلي مش عايز يزاكر يعمل ايه...؟؟؟

انا زهقت من ام الكليه دي... وكل ما احاول اجي علي
نفسي واقول يا بنتي لمي نفسك وزاكري...خلاص هانت.
برضوا مش قادره اجي علي نفسي....ورايا ميت حاجه
ومش عارفه ازاكر ولا اي حاجه...انا اتخنقت بجد...
انا كنت داخله الكليه حلوه وزي الفل...هتطلع منها نظري
رايح.. وشعري كلها وقع.. وخسيت ..يالهوووووووي
يارب ارحمني

مجانين

فاكر لما قلتلي نفسي احطلك مونيكير
وجيت تجرب ... كنت بتدهن صباعي
زي ما يكون بتدهن حيطه...مش عارفه
اول ما شوفت الصوره...قعدت اضحك
وافتكرتك... والله احنا الاتنين مجانين
ودماغنا طقه

لو اتسديتي يا دنيا في وشي
مش راح ادير انا عنك وشي
هفضل اواجهك..
وعمري ماهحزن...
اصل مفيش ولا حاجه تستاهل..
اضايق نفسي وتنزل دمعي
ياما حزنت .. وياما زعلت..
وحالك حالك وي ما هوا
يوم معايا ..ويوم عليا..
كفاياكي قسوه يا دنيا علينا..
ليه علي طول دايما كرهانا...

والله مافي حد يستاهل ف الدنيا دي تستاهل
تزعلي نفسك عشانه
ايلي باعك بيعه وارميه و ورا ضهرك ولو رجع تاني متعبروش

افهمني

مش معني اني بخاف عليك..اني مؤرفه وزنانه
ومش معني اني بقول رأيي ...انك مش عارف مصلحتك
ومش معني اني بغير عليك ... اني مش حلوه
ومش معني اني كل شويه نفسي اسمع صوتك...ان دماغي فاضيه ومورايش حاجه
ومش معني اني محتجاك...اني ضعيفه
ومش معني اني بحبك... اني تعتبرده نقطه ضعفي

11/11/2011

بما اني ملحقتش اتجوز في 11/11/2011 فادعولي الحق
اتجوز في 12/12/2012عشان انا بقي كده زهقت
وحسه اني بقيت تقيله عليهم في البيت؟؟؟؟؟

ربنا يخليك ليا.. بجد كان يوم حلو اوي ... وانبسطت اوي اوي..
بالرغم  اني مشوفتكش غير ساعتين..بس انبسطت اوي... وبالرغم
من انك كنت لسه معايا من يومين.. بس كنت حسه انك واحشني اوي..
عارف اكتر حاجه فرحتني ايه.... لما نادتلي قدام الناس كلها... اميره؟؟
فبقولك نعم؟؟ قلتلي وحشتيني بصوووووووووت عالي...اتكسفت اوي..
وانبسطت اوي... ربنا يخليك ليا .. وميحرمنيش منك ابدا

كل سنه وانتوا طيبين

كل سنه وانتوا طيبين .. وربنا يعود علينا الايام دي بخير
وكلنا مبسوطين وفي صحه وسلامه...
كل سنه وانت طيب يا حبيبي ... ربنا يخليك ليه ويخليني ليك..
ربنا يوفقك في حياتك علي طول... ويسعدنا ويهدينا لبعض..
يارب السنه الجايه ان شاء الله نكون في بيتنا...بحبك اوي

مبسوووطه

مبسوووووووووطه... مع اني مش عارفه ليه ؟؟؟؟ بس مبسووطه