إجمالي مرات مشاهدة الصفحة

الأربعاء، 27 فبراير، 2013

دكتور نفساني

عايزه اقولكم علي حاجه..انا بفكر اليومين دول ..
اني اروح لدكتووور ..
نفسااااااااااااااااني ..
استنوا ..استنوا ..انا لسه الحمد لله متجننتش...
يعني بس بفكر قبل الجواز اروحله..عايزه اكون 
شخصيه سويه..مش عايزه اكون الزوجه المصريه
النكديه الاصيله..
مش عارفه ممكن يساعدني ولا لا...
انا عايزه انجح في حياتي ومش عايزه افشل..
مش عايزه اقع ف الاخطاء ايلي ناس كتير بتقع فيها
ومنهم بيتنا..
عايزه امشي حياتي بأسلوب معين ..
طبعا مفيش حاجه بتكون كامله 100% بس علي اقل
احااول..
عايزه اساس حياتي يكون صح.....
مش عارفه ...يا تري ممكن يساعدني ..ولا لا 
انتو ايه رأيكوا؟؟؟؟؟

السبت، 23 فبراير، 2013

عم محمد

لما بشوفك بحس الدنيا لسه بخير..
وان اهم حاجه في دنيتنا ..هي اخرتنا..
عم محمد راجل عنده فوق الستين..
عم محمد..ابنه الكبير توفي بالسرطان..
عشان ملقاش يتعالج...
كنت عارفه ان ابنه تعبان وكنت بنحاول 
نساعده علي قد ما نقدر...
ابنه ماااات ومحدش فينا اخد باله..
مع انه بيجي كل يوم....
بس الابتسامه ايلي علي وشه..
والصبر ايلي بيشع منه..
والدعوات ايلي دايما علي لسانه..
تخليك متخدش بالك من همه..
قد ايه هوا راضي بحاله...
معرفناش غير انه مجاش يوم ..
بسأله؟؟
قال كنت ف اربعين ابني...
قد ايه صابر ومتماسك..وراضي بحاله..
انا مشوفتش في حياتي كده..
عم محمد عامل النظافه..
ربنا يديه طولت العمر

الثلاثاء، 19 فبراير، 2013

وحشتني

حب لدرجه الجنوون ...
او يمكن عشق مالوش حدود..
لهفه ووجع وانت بعييد..
احساس بالوحده.. واليتم..
خنقه غريبه وكل حاجه ابيض واسود..
الالواان اختفت من الصوره..
وحشتني اووي 

السبت، 16 فبراير، 2013

الكرش المصري الاصيل

سماااات الرجل المصري....
الكرش المصري الاصيل...
عشان كده الراجل المصري تقدر تعرفه لو 
بين مليون واحد تركي ولا اجنبي...
ياتكم وكسه يا رجالتنا...
نياهاهاهاهاها
الموضوع ده ف الحقيقه..عاملي ازمه نفسيه!!!!
الشباب كلهم بقوا بكرش..
ولسه ف العشرينات..
امال لما توصل للاربعين هتكونوا عاملين ازااااي..
وفالحين بس لو الست تخنت شويه تفضحوها...
انا الحمد لله معننديش الاوبشن ده...انا رشيقه :)

الأحد، 10 فبراير، 2013

عني وعنك

عن كلام كتير عاوز يتقال ومبيتقالش..
عن صوت مكتوم بينادي عليك..ومبيتسمعش!!!
عن خوف رهيب ساكن قلبي جوااك..
عن عشره عمر
عن ولد وبنت ...
عني وعنك..
عن حياه بره تشبه ناس كتير..لكن ف الحقيقه بتختلف
عن شوق ولهفه وقت اللقا...
عن حلم حلمناه ..ولسه متحققش..
عن حب سنين بتهدده الاوهام...
عن رحله طويله يمكن متكلمش..
عن خوف من مستقبل مالووش ملامح
عن تناقض جوانا ..مخلينا دايما خايفين...

الخميس، 7 فبراير، 2013