إجمالي مرات مشاهدة الصفحة

الاثنين، 31 ديسمبر 2012

كل سنه وانا  وطيبه
وكل ايلي بحبهم كويسين ومبسوطين...
حاجات كتير مقدرتش احققها السنه ايلي فاتت
عندي امل احققها ..حتي لو لوحدي..هحققها ان شاء الله
كل سنه وانا اقوي من ايلي قبلها..
كل سنه وانا قريبه من ربنا اكتر ..
ياااارب انا محتجااك جمبي علي طول..
محتجااك تقويني..
وتقربني منك اكتر ..وتهديني
يااارب ماليش غيرك...
يارب بحبك اوي..
يارب احفظلي اخواتي..ومتحرمنيش منهم ابدا..
يارب اسعد ابويا وامي..
وطوول في عمرهم..
ياااارب انجح في حياتي..
يارب ريح بالي وقلبي....
امييين يارب العالمين
كل سنه وانتوا كلكوا طيبين 

الأحد، 30 ديسمبر 2012

واهي سنه وعدت

فاضل فيكي يوم وهتكوني  سنه وعدت...
بحلوك ومرك خلاص خلصتي....
انتهيتي ..
مش قادره اجمع كل الاحداااث ..
بس في المجمل كنتي سنه تقيله...
مش فاكره حاجه حلوه مميزه ...
غير اني اتخرجت من الكليه وعديت مرحله 
من حياتي .ودخلت مرحله تانيه ملهاش ملامح...
لكن الوحش المميز فيكي كتير..
اخيرا خلصتي....
بس انا متفائله ايلي جايه احلي منك.. ان شاء الله..
كل ايلي حساه دلوقتي ان ناقصني حاجات كتير 
كان نفسي تتحقق ..بس شاء ربنا انها متتحققش...
حسيت بضياع وحساه اوي دلوقتي ...ضايعه من نفسي...
محتاجه احس بحاجات معينه...بس محدش فاهم ده..
مش عارفه اضحك من قلبي وانسي همومي...
محتاجه اوي استقر في حياتي وفي شغلي !!!!
موجوعه ..بس عندي امل قريب ارتاااح..

الجمعة، 21 ديسمبر 2012

انتظرووووني

نياهاهاهاهاهاهاااااااااااااااااااااا
سبت الصيدله ..والصيدليه ايلي مش بتجيب همها 
غير وجع القلب والشلل,...
وبعدين هحكيلكوا علي طرائفي في الصيدليه...
ايلي سبتها وبقيت عاطله بلا شغل...
واتجهت الي اعمال الكروشيه....
متستغربوش...!!!
الفراغ بيعمل العن من كده بكتييير...
وانتظروني قريبا هنزلكو مجموعه من اعمالي العظيمه
المتميزه..ايلي مش هتلاقوها عند حد تاني...
انتظروووووووووووووونا

الأربعاء، 12 ديسمبر 2012

اخواتي الحلوين

كان يوم جااامد جدا وربنا يخليكم ليا يا 
اخواتي الحلوين...اتبسطت اوي....
وبما ان ملقناش حد يعبرنا ويفاجئنا النهارده!!!
قررنا ننبسط ونقضي اليوم سوا كلنا احنا
الاربع بنوتات ....
احلي اخوات واحلي بنات في الدنياااا...
مش لازم نعتمد علي حد في انبساطنا...
بالرغم بساطه اليوم ..بس كان مميز بكل حاجه
فيه...كفايه ان احنا كنا سوا
ربنا يخلينا لبعض..
ويخليلنا بابا وماما ...
الله يكون في عونهم مستحملين اربع مجاانين...

الثلاثاء، 11 ديسمبر 2012

12/12/2012

السنه ايلي فاتت عملت بوست وقلت بما اني ملحقتش
اتجوز في 11/11/2011 فادعولي اللحق 12/12/2012
وبما اني ملحقتش وربنا ما ارادش ان ده يحصل...
فالحمد لله علي كل حاجه...
مش لازم يكون تاريخ يوم فرحنا مميز..
هو ان شاء الله في كل الحالات هيكوون مميز...
هيكون مميز بكل حاجه فيه...
اينا باكينام وانا واثقه في نفسي...
ههههههههههه
ايه رأيكوا في الثقه ديه !!!!!

الأحد، 9 ديسمبر 2012

ايلي جاي احلي

بالرغم كل حاجه كل الظروف وكل المشاكل ايلي حصلت
وايلي هتحصل....بحبك !!!
متستغربوش...!!
كتير بزعل .. وكتير بضايق وبتخنق منك....
بس انت اختياري ...ايا ان كان غلط او صح... اختياري...!!
محدش اجبرني عليه...ولا اخترتك عشان مصالح او غيره..
كل الحكايه اني حبيتك...
وعارفه انك بتحبني...
حتي لو استنيت منك في اوقات تثبتلي ده....
بس عارف...
هوا انت ومينفعش يكون غيرك في حياتي...
وان شاء الله ولا هيكون ...
ومهما كانت الظروف او العقبات ايلي ادامنا...
هتعدي باذن الله...
ومتاكده ان ربنا شايل لينا كل حاجه حلوه...
وهتحصل في وقتها...
خلاص بقي معدش فيه مشاكل ولا زعل ولا نكد...
مفيش حاجه مستاهله ...وكله بيعدي..

الأربعاء، 5 ديسمبر 2012

ذكريااااات

قلت ارجع بالزمن لورا...واشوف دفاتر قديمها مخبياها وورق ...
اتبسطت لما شوفت ايلي كنت كاتبهولي...
افتكرت قد ايه الحاجات الصغيره دي كانت بتبسطني....
قعدت اقراها كلها وابتسم...!!!
لكن بعدها حسيت قد ايه مر الزمن....
وعدت سنين واحنا سوا...
ولا حاجه اتغيرت....
لا حياتنا اتغيرت...!!!
ولا عيوبنا اتحولت...!!
ولا خيبه ظني بقت أمل ...!!!
بعد ما ابتسمت وحسيت اني مودي اتغير بعد ما كنت زهقانه...
فجأه اتقفلت اكتر من الاول...!!!
ليه.؟؟؟؟
سؤال مالوش اجابه...!!!!
فكرت..
لقيت عدي علينا سنين واحنا واقفين في نفس المكان....
متحركناش....
ياتري هيجي وقت ونتحرك.....!!!
يا تري هيجي اليوم ايلي مش هتخيب فيه ظني...!!
ياتري انا ازاي محستش ان الوقت بيعدي ..مع اني عشت كل لحظه فيه..
قد ايه حسه بالخوف..

الأحد، 2 ديسمبر 2012

خوف غريب

رغم اني محتاجه حاجه جديده في حياتي...
ومحتاجه افرح من قلبي بجد...
فرحه تنسيني الدنيا .وتخليني في عالم تاني...
بس خايفه.....
خايفه من ايلي جاي...
خايفه افرح ويخلص وقت الفرحه..
وارجع ما كان ما كنت...
ياتري ايه ايلي مستنيني..
وياتري كل ايلي اتمنيته ونفسي احققه...
هفضل طول عمري عايزاه...ولا هرجع اندم...
وهيكون مجرد لحظه عابره في حياتي...
محتاجه ارتاااح.......
محتاجه احس بوجود حاجات معينه في حياتي...
محتاجه اتغييير واغير كل حاجه جوايا...
انا ايلي بايدي ده كله...
بايدي اخرج من الحاله ايلي انا فيها...
بس مش عارفه ايديا متربطين ليه...
يمكن محتاجه حد يساعدني !!!!

الخميس، 15 نوفمبر 2012

ايوه انا ساعاات بكون مفرفشه ومببطلش ضحك..
وساعات تلاقيني  حزينه بطريقه غريبه ومش ببطل عيااط.

ايوه انا ساعات بحس اني نفسي ارغي معاك للصبح..
وساعات اكون مش طايقه ارد عليك ولا حتي اسمع صوتك....

ايوه انا ايلي بتجراحها بكلامك كتير اوووي...
بس متقدرش تبعد عنك لحظه....

ايوه انا ايلي بقعد اواسيك من حاجه مضايقاك...واحاول اهون عليك...
بس ف نفس الوقت ببقي مضايقه من نفس الحاجه ومحتاجه حد يطبطب عليا....

ايوه انا ايلي بتلاقيني بقولك كلام واحده عاقله وكبيره اوووي
وساعات اكون زي الطفله...

ايوه انا ايلي ممكن اقولك كلام يجرحك ..وببقي عارفه انك مجروح..
بس برضوا مقدرش اسيبك يوم واحد من غير ما اكلمك...

انا ايلي بتكون شايفني بني ادمه مختلفه في كل حاجه...زي ما اكون تركيبه غريبه...
واوقات تحسني عاديه جدا وزيي زي غيري...

انا ايلي لما حبيتك حبيتك بصدق....
بس ممكن في يوم اكرهك.... وبرضوا هيكون بصدق

ايوه انا ساعات بتحس انك نفسك تاخدني في حضنك ونبعد بعيييد...
وانا برضوا ايلي بكون نكديه ومقرفه وضاربه بوز القرد

الاثنين، 12 نوفمبر 2012

ناس صح في وقت غلط

لما تلاقي حد ماااالوش اي علاقه بيك ولا يمثلك حاجه في حياتك
وبيهتم بيك اهتمام عمرك ما شفته....وشايلك فوق دماغه...
وبيتمنالك الرضا ترضي.... وبيزعل لما يشوفك مضايق ....ويفضل
جمبك لحد ما يشوفك مبسووط...
وحد تاني المفروض انه اهم حد في حياتك ومش حاسس بيك....
ولما بيشوفك مضايق ..بيهرب ....وبيبعد.....
معاااااك ...بس حاسس انك وحيد....
مستني منه حاجات كتير اوي ...بس للأسف مبتحصلش.....
محتاااجه جمبك اوي...ومش موجود......
واحد بيديك كل الاهتمام والاحترام..ومش مستني في المقابل اي 
حاجه....والتاني مديله انت كل حاجه... وبيستقبل ده كله....
ببروود وعدم اهتمام...بس بالرغم من ده كله عايزه...
مش شايف غيره في حياتك ...بس للأسف هوا مش شايفك....
مبيحسش بيك....نفسك يحبك بطريقه معينه...
بس عمرها ما هتحصل...عشان عمره ما هيتغير....
عشان محاولش يتغير ولا هيحاااول !!!!


الأحد، 11 نوفمبر 2012

الأحد، 4 نوفمبر 2012

تن تن تاااااااااااااااااا

انا مشوفتش نحس يا اخواتي في حياتي بالشكل ده...
ماهو مش كل ما نقول يا جوااااز تتطلعلي حاجه...
واخيرا ......
تن تن تااااااااااااااااااااااااااا
جه اليوم ايلي مستنياه من زمااااااااااااااااااااااااااان
الحظ هيلعب معايا لعبه دنيئه......!!!!!!!!!!
وشكلك يا احمد هتدخل الجيش.....
وساعتها هعرف ان مصر كلها متأمره علياااااااااااا
حتي الجيش المصري....  :((
بالرغم من نظرك الشيش بيش .... هياخدووووووووك
والنبي يا جماعه ادعولي كده ربنا يكرمني ويفك النحس...
ووعد مني كل ايلي هيدعيلي دعوه حلوه,,, واتحققت
ان شاء الله..
هعزمه علي الفرح وهعمل معاااه الواجب كله
يالا بقي ادعو بزمه...واستنوني يوم الاربع
هيكون مبسوطه ومزأططه....
او قاعده بولول !!!!

الخميس، 18 أكتوبر 2012

كن جريئا

ليتك تسرقني..........
من اهلي......من مدينتي.....من نفسي...
ليتك تخطفني من سجن الانتظاااار.....
وتهرب بي لصا جريئا في وضح النهااار....
وترحل بي بعيدا...قريبا....
الي اقصي...اقصي نقطه في قلبي...
كن جريئا ....حبيبي
كن قويا ....حبيبي

الثلاثاء، 9 أكتوبر 2012

الجمعة، 5 أكتوبر 2012

مرتااااااحه الحمد لله

بالرغم اني حياااتي متلغبطه جدا...وان كل حاجه ماشيه بالعكس
ومستقبلي ملوش ملااامح.....
بالرغم اني قرفانه جدا من الصيدليه ايلي بشتغل فيها....
وكل يوم برجع مضايقه....
يالرغم من اني كنت في فتره اكتئااااب حاده .....
ومحدش وقف جمبي....!!!!!!
بس انا راااااضيه اوي دلوقتي الحمد لله.....
يالرغم ان في حياتي نااااس اديتهم اكتر من حقهم...
ولسه موجودين....
احب اقولكوا مش هتحسوا بقيمه ايلي ف ايديكوا...
غير لما اختفي من حياتكوا؟؟؟؟
بس وقت ما هختفي وهبعد والله هكون مقتنعه تماما ...
ومرتاااااحه اوي....
كل واحد يبص ف المرايه...ويواجه نفسوا...
ويحاول يتخلص من العقد والكلاكيع ايلي جواااه....
شوف حقيقه نفسك.....
قبل ما حد يواجهك بيهااااا وتبقي صعب علييك...!!!
انت عارف نتيجه معاملتك ليه ايه؟؟؟؟
اني عرفت اني كتيره عليك!!!!
وكتيره علي اي حد ميقدرنيش وميقدرش حبي ليه !!!!
واني استاهل احسن حاجه ف الدنيااااا
احمدك يااارب علي كل النعم ايلي اديتهاني ....
وسامحني علي كل لحظه عصيتك فيها 

الخميس، 6 سبتمبر 2012

الطريق الغلط

لو ماشي في طريق...وبعد ما مشيت منه مسافه
كبيره اوي..حسيت انك ماشي في الطريق الغلط...!!
ان الطريق ده مش هيوصلك للعنوان ايلي انت عايزه..؟؟
هتعمل ايه؟؟؟
هترجع تاني..مع ان الطريق كان صعب وكله مطبات...
ولو رجعت لورا تاني احتمال تقع....!!
.واحتمال تاني . متعرفش توصل لبدايه الطريق..وتتوه
مفيش اختياراات قدامك كتير....
بس الاحتمالااات كتير اووووي...
وانت متلغبط ومش عارف تعمل ايه...؟؟؟؟
وفي تفكيرك الوقت ايلي انت ضيعته ف الطريق ده....
وكمااان الصعوبااات ايلي قابلتها واتحملتها...!!!!!

الثلاثاء، 4 سبتمبر 2012

انا

مبسوطه
زعلانه
مخنوقه
متلغبطه
حيرانه
غيرانه
متفائله
متطمنه
خايفه
عشقاك
كارهاك
موجوعه
مجروحه
منتظره
راضيه..... الحمد لله

الخميس، 30 أغسطس 2012

ياااااااااارب



ياااااااااارب مالناش غيرك..
يارب فرح قلب ابويا وامي واخواتي..
عشان ملناش غيرك.... وعشان تعبنا !!!
تعبنا اووووي ....
 وعشان انت اكيد حاسس بينا...
محتاجين معجزه من عندك عشان نرجع زي زمااان 
محتاجين فرحه تبعتهالنا تجمعنا تااااني...
ياااااارب فرح قلوبنا....
 

الاثنين، 27 أغسطس 2012

ليه مش متخيل اني ممكن امشي فعلا....ممكن اختفي !!
ممكن مرجعش!!!
يمكن عشان متأكد مليون في الميه من حب ايلي قدامك ليك !!!
يمكن عشان انا مش مدياك فرصه تتخيل ده..
عشان بعشقك...!!!
بس ايلي متعرفوش اني لو اخدت قرار اختفي من حياتك..
هختفي...؟؟؟؟
حتي لو عملت المستحيل...
انا ليه تعبانه معاااك؟؟؟؟
من الغباء ان كل مشاكلنا زي بعض...
كل مره بتغلط نفس الغلطه وتهرب....
ليه بتهرب وتسيبني لوحدي....

الأحد، 29 يوليو 2012

ااااااه منك ؟

يمكن اكون مش ملكه جمال ولا بيضه وشقرا...
وايلي بيقيس الجمال بالشكل يبقي بني أدم تافه....
يمكن اكون بنت عاديه جدا....
بس ثقتي في نفسي...
 بتخليني حلوه في نظر نفسي ونظر الناااس.....
الثقه مش حاجه وحشه..بس طبعا مش غرور..
واثقه في ربنا ..وواثقه في نفسي...وواثقه في قدراتي...!!!
واثقه اني بعمل ايلي عليا والحمد لله....
عارفه اني مبقصرش في حق حد....
يمكن تكون شايفني غير كده....
بس ان شاء الله هيجي يوم واثبتلك عكس كل حاجه انت شايفها ؟؟؟
كان نفسي يكون شريكي بيحفزني ويشجعني اكون احسن واحسن...
نفسي تبطل اسلوبك ده....نفسي تعرف اني لو مش بحبك عمري
في حياتي ما كنت هستحملك !!!!

الخميس، 26 يوليو 2012

الحمد لله

ياااااااااااه الحمد لله نجحت واتخرجت....
مش حسه اني فرحانه علي قد مانا مخطوفه ومتاخده كده..!!!
مش عارفه ليه ؟؟؟؟
خلصت مرحله من حياتي وداخله في مرحله جديده...؟؟؟
جديده بكل معانيها وف كل حاجه؟؟؟؟
المفروض دلوقت افكر ايه الخطوه الجايه..وايه  ايلي 
مفروض اعمله...
حسه اني تايهه...
يارب وفقني في كل خطوه هاخدها في حياتي..
واهديني....
واكتبلي الخير يااااااارب

الخميس، 19 يوليو 2012

رمضان كريم



كل سنه واحنا كلنا طيبين وبخير دايما يااااارب
كل سنه وانتوا بصحه وسعاده....
يارب اغفرلي كل زنوبي..واهديني ...
يارب يكون رمضان ده مختلف وكله عباده..
ومضيعش لحظه الا وانا بستغفرك...
يارب استجيب لكل دعواتي ...

امين يارب العالمييييين.....

الأربعاء، 4 يوليو 2012

الأنتخه وما بعد

مممممممممم.......خلاص الحمد لله خلصت....بس والله قد ما كان نفسي
اخلص...زعلانه...بس شئ طبيعي مسيري كنت هخلص الكليه وجو 
الجامعه والحاجااات دي....مبعملش حاجه في حياتي غير اني نايمه...
وبعد ما كان في دماغي مليووون حاجه اعملها.....
اول ما خلصت دماغي فضيت وقررت  أانتخ.....!!!!!!
وما اجمل ان لا افعل شئ ...ثم استريح قليلا......
هوا ده ايلي ده فيه بالظبط....نيهاهاهاهاهاها...
انا حتي كنت مكسله اكتب بوست..في كسل اكتر من كده!!!!!!

الاثنين، 25 يونيو 2012

فاضل ع الحلو ماده

مش عارفه مبسوطه ولا لأ؟؟؟؟
من يوم م دخلت الكليه بعد الايام عشان اتخرج.....
وجه وقت التخرج ان شاء الله يعني....!!!!!
نياهاهاهاهاهاهااااااااااا
خلاص بعد بكره وهكون خلصت  اخر امتحان ليا 
ان شاء الله في كليه...
يعني معدش فيه مزاكره...
مش هشتري رزم ورق تاني..ولا قلمي المفضل؟؟؟؟
يااااااااااااااااااااه .....
والله حسه اني مقهوره...وحسه اني كبرت...
خلاص الجو الجامعه دي انتهي....
وداخله علي مرحله جديده في حياتي...
بس هيا دي سنه الحياه...!!!!!!!!!!!

الثلاثاء، 12 يونيو 2012

كانت زكريات

الحياه دي غريبه اوي...اكتر حاجه بكرهها في حياتي هي الفراااق...
عمري ما اخترت اني ابعد عن حد بمزاجي....اكتشفت مؤخرا.. ان الدنيا
دي مصالح...كل واحده بيدور علي مصلحته حتي لو هيدوس علي غيره...
اتعلمت السنادي حاجات كتير..يمكن نقطه تحول في تفكيري وحياتي...
يمكن اتصدمت في ناس كتير حواليا..كنت بعتبرهم اكتر من اخواتي..
بمكن دلوقتي مش حاسين قد ايه انقهرت واتجرحت منهم....
اصل دي عشره 5 سنين...اكتشفت ان الكليه مش بتتطلع منها غير بصاحبه
او اتنين بالكتير.....
اي حد باعني او جرحني فهو ايلي خسرني ..عشان انا الحمد لله عمري ما
قصرت من ناحيه حد....ودي اكتر حاجه مريحاني...
مستنيه الوقت ايلي يحسوا فيه بقيمتي..بس هيكون فات الاوان..عشان بعدهم
غير فيا حاجات كتير...!!!!!!!

الثلاثاء، 29 مايو 2012

شخبطه

هوا ده حالي دلوقتي اوي يمكن من فتره...
عارف لما كل حاجه تضغط علي الواحد...شغله ..مزاكرته
...حياته...وكمان احوال البلد..تسد النفس..!!!!!




انت عارف انا الفتره ايلي فاتت دي اتغيرت اوي ....
بالرغم اننا بعاد اوي عن بعد في الوقت ده...
لكن حبيتك زياده علي حبي ليك مرتين كمان....
بس معرفش ليه؟؟؟؟؟
اانت عارف انا مستاهلش في الدنيا دي حد غيرك.....
ولا انت كمان تستاهل حد غيري....
احنا كده حلوين علي بعض...بالرغم من كل الخلافات..
والاختلافات...!!!!


السبت، 28 أبريل 2012

خليك دايما الاول

بايدك تكون الاول....وبايدك تكون الاخير....
الاول بيكون الاول في كل حاجه...لو رجع لورا شويه...
بيعافر عشان يرجع زي ما كان واحسن......
لكن الاخير هيفضل طول عمره  كده...هيفضل دايما زرا
عمره ما هيسبق حد...مدام مبيحاولش ...مبيجريش....مبيجازفش..
حياتنا كلها بادينا ...بنحركها زي ما احنا عايزين...
عامل زي ما يكون في مركب...لو انت ايلي بتقودها هتمشي في
الطريق ايلي انت عايزه ورسمه لنفسك....!!!!
لكن لو سبتها وفضلت مكانك...الرياح هتطوحك في الاتجاه
ايلي هيا عايزاااااه......
متسبش حياتك حد يمشيها....
مشيها علي مزاجك زي ما انت عايز....
خليك واثق في الله...
وواثق في النجاح.....
وواثق في نفسك....
اوعي تتخلي عن هدفك مهما كانت الظروف...اكيد في يوم هتوصلوه...!!!

السبت، 21 أبريل 2012

عن الرجاله احدثكم

طبعا بعد البوست ايلي فات اصدقائي المدونين الرجاله..غالبا مش هينوروني تاني ...
عشان انا قررت اعمل حمله ضد الرجاله؟؟؟؟ نياهاهاهاهاها
عشان انا شايله منكم وكل ستات مصر شايله منكم....!!!!!
ده انا كل ما اقابل واحده متجوزه...تقولي  يا اختي انتي متسربعه علي ايه..
بلا جواز لا هم..ده الرجاله كلهم زي بعض....
اقوم انا ارد بكل ثقه واقولها لو الرجاله كلهم زي بعض...فانا مش هكون زي اي ست؟؟؟؟؟
تقوم بصالي بقرف...وتقولي بكره نشوف...وتمشي وتسيني...؟؟؟؟
انا بصراحه بقول ماهي المبسوطه ..اكيد مش هتقول انها مبسوطه..عشان متتحسدش..
اصل برضوا معظم البنات عندهم حتت اللؤم دي!!!!!
يا رجاله مصر الاعزاء.......
انتوا عارفين لو تبطلوا قله زوق شويه...ويبقي عندكم شويه رحمه..والله هتكونوا زي العسل...!!!
لكن انتوا اصلا عاملين زي القرع تمد لبره....
بتحبوا تبصوا بره ولايلي في ايد غيركوا......
والله حتي لو مراتك زي القمر.....برضوا هتناديها وانت بتتفرج علي التليفزيون..
وتقولها شوفتي الستات....
ربنا يصبرنا عليكوااااا....

الأربعاء، 18 أبريل 2012

يالهوي عليكوا يا رجاله

ايلي يقول بقي ان الستات نكديين...يبقي غلطاان ...هوا مش غلطان اوي
بس غلطان....؟؟؟ماهي الواحد لو لاقيه راجل بمعني الراجل...مش هتنكد 
علي ايلي جابوه...وهتبسطه وهتدلعه...؟؟؟
ماهو متجيش تنرفزها ...وتعصبها...وتشلها ببرودك...وتقول دي بتزعق
طول النهار...
ليه تضايقها ....لما ممكن متضايقهاش...؟؟؟؟؟؟ها ليه؟؟؟
ليه تحرق دمها وتخرجها عن شعورها....لما ممكن متحروقوش....؟؟؟؟؟؟
ماهو بصراحه بقي انت ايلي بتجيبه لنفسك....؟؟؟اه انت ايلي بتجيبه لنفسك...؟؟؟
ليه متسعدهاش,,,وليه متريحهاش شويه.....
مش هتنشك في ايدك لو شلت الاكل مكانك وديته المطبخ...
مش هتنشل في لسانك لو قلتلها كلمتين حلوين..حتي يا سيدي ولو مجامله..
مش هيجرالك حاجه لو قمت عملت لنفسك كوبايه شاي ...وهي تعبانه وطول النهار
بتنضف البيت....
بحاجات بسيطه اوي مش هتاخد منك وقت ولا مجهود هتريحها شويه....؟؟؟؟
اما بقي نيجي للخطيب...ايلي ان شاء الله هيفقع مرارتي.....
ادعي علي الاب بتاعك يولع يعني..عشان ارتاح من ام النت ايلي طول النهار قاعد 
عليه....صبرني ياااااااااااااارب

الأربعاء، 11 أبريل 2012

ضايعه من نفسي

ضايعه من نفسي ومش لقياني...
ومش عارفاني...
ومش حسه بأي حاجه ...
ضايعه وكنت محتاجه ناس معينه حواليا...
تحس بيا...
وملقتهومش...
اتجرحت.....
واتصدمت...
يمكن اتهزت ثقتي في نفسي...
يمكن فقدت الثقه في كل ايلي حواليا...
يمكن مخسرتش حد..بس بالعكس هما ايلي خسروني...
طلعت طيبه زياده عن اللزوم...او يمكن اسميها سذاجه...
كانت فتره صعبه اوي...مش كنت عارفه اخرج منها...
بس  مش عارفه المشكله فيا ولا ايلي حواليا..
هوا بقي الطبيعي .الكذب...والخداع...واللؤم...

السبت، 24 مارس 2012

من النهارده ؟؟؟

من النهارده ...مفيش احزاان..اااه....
من النهارده....مفيش احلام...اااااااه...
مفيش اوهااام ....اااه....
من النهارده مفيش بتنجااان...اااااااااااه
من النهارده...حب....طب مفيش ده كماااااان..
ايوووووووووه مفيش ده كمااااااان...واييييييييه
ومحدش يبصلي ويقولي ايه ايلي بتقوليه ده...؟؟؟
انا قلت مفيش ده كماان...يبقي مفيش...
من غير نقاااااااش....
مفيش حب....
يعني؟؟؟؟؟؟؟؟؟
مفيش مسؤليه...
مفيش احتراام...
مفيش قيمه...
مفيش قيمه....
يبقي ليه حق بقي اقول مفيش حب ولا ماليش؟؟؟؟
ازاي هيكون موجود ودول كلهم مش موجودين؟؟؟
هااااااا ازاااااااااااي  ..؟؟؟؟؟

الخميس، 22 مارس 2012

متلغبطه

الفتره دي فتره غريبه...وايام عجيبه...
انا نفسي مش عارفه حسه بايه؟؟؟
ومش عارفه انا عايزه ايه؟؟
حسه اني متلغبطه.....وعايزه اعمل مليون حاجه..
في وقت مينفعش اعمل اي حاجه...غير اني ازاااكر؟؟؟؟
انا مخي بدأ يشتغل....؟؟؟ اه والله بجد بدأ يشتغل....
كان واقف بقاله كتير...حسه انه فاتني حاجات كتير معملتهاش
وجايه افتكر نفسي علي اخر شهر في الكليه...؟؟
وبرضوا حسه ان فيه حاجات كتير مستنياني اعملها...؟؟؟
مش عايزه حياتي تقف علي اني اعلق الشهاده في المطبخ....؟؟
عااايزه اعمل حاجات كتير اووي...
وحسه اني من كتر الحاجات ايلي نفسي اعملها ...مش هعمل اي حاجه؟؟؟
نفسي بعد عشر سنين...اكون حققت ايلي نفسي فيه....
واكون فعلا اميره ايلي انا عايزاها....
نفسي اكون حاجه كويسه...نفسي اكون ساعتها لسه بحلم...وبحاول
احقق احلامي....
انا خايفه اووي ...خايفه مكونش اي حاجه؟؟؟
خايفه معملش حاجه؟؟؟

الأربعاء، 21 مارس 2012

كل سنه وانتي طيبه يا امي

كل سنه وانتي طيبه يا ماما..
كل سنه وانتي بخير..
كل سنه وانتي معانا وحوالينا...
عارفه انك كتير بتزعلي مني ...وكتير اوي بضايقك...
وعارفه اني مقصره في حقك...
وعارفه انك بتستني مني حاجات كتير اعملها وبخيب ظنك؟؟؟
والله بحبك اووي...اكتر ما تتخيلي....
اسفه علي كل لحظه زعلتك فيها....اسفه علي كل حاجه حصلت
مني ضايقتك وخيبت ظنك فيا.....
اسفه عشان ساعات بتبقي تعبانه ومش بتبيني ..واحنا مش بنحس بيكي...
ربنا يخليكي ليا...وميحرمنيش منك ابدا ...بحبك اوي

الأحد، 18 مارس 2012

ليه؟؟؟

ليه دايما بنقابل الناس الصح ف الوقت الغلط؟؟؟؟
والناس الغلط ايلي المفروض ميكونوش موجودين...دايما موجودين؟؟؟
ليه دايما في الوقت الصح ايلي محتاج كل حاجه تكون صح...
بتبقي كل حاجه غلط.....؟؟؟؟؟
ليه بنقابل ناس ويفضلوا في حياتنا فتره قصيره اووي..
بس بيأثروا فينا اووي...وبيغيروا فينا حاجات كتير ...
وناس بيفضلوا جمبنا طول حياتنا...سواء بمزاجنا او لأ..
بس مبيغيروش اي حاجه فينا...مبيسبوش حتي علامه...
وجودهم ....زي عدمه....
يمكن متعرفوش الكلام ده وعمري ما قلتهولكوا....وعمري
ما هعرف اقولهولكوا...عشان انتوا اختفيتوا...
بس بجد غيرتوا فيا حاجات كتير ...شخصيتي...تفكيري...
ومستقبلي...اي حاجه كويسه انا فيها دلوقتي....
انتوا السبب فيها...

الخميس، 8 مارس 2012

koshary day

طبعا هتستغربوا من العنوان...وهتقولوا ايه كشري داي ده؟؟؟؟
دي فكره مطرقعه واحد زميلي قرر انه يعملها في الكليه....؟؟؟
وان  الفكره مش ف الاكل...الفكره ان كل الكليه تتجمعه ونقضي
وقت حلو وننبسط...وبرضوا منها نعمل عمل خيري.....نجمع
تبرعات لمستشفي الاورام....اليوم كان جامد جدا...وكل الناس 
ايلي حضرت انبسطت اوي...عشان فعلا التنظيم كان كويس
وتعبنا بجد عشان نقدر نطلع اليوم حلو ونبسط الناس.......انا
اه متعبتش زيهم اوي...عشان طول الاسبوع كان عندي حاجات تانيه
برتبلها....بس بجدده احلي يوم قضيته في حياتي في الكليه...وقررنا 
ان احنا ان شاء الله..كل اسبوع هنعمل ايفنت جديد...بفكره جديده...
احنا مش تبع اسره ولا اتحاد..ولا لينا في ده اصلا....بس احنا
بجد طلعنا احلي جروب في الكليه...وربنا يخلينا لبعض...
انبسطت اوي...وبحبكوا اوي

الجمعة، 2 مارس 2012

اشعر بأن جميع الابواب قد اغلقت
جميع الانوار قد اطفأت.....
حتي ذلك الشعاع المنبعث من زجاج النافذه قا اختفي...
كان يعطيني الامل.......
كان يجعلني اتحمل قسوه الايام........
ولكنه ايضا اختفي.....
الظلام يملأ المكاان....
السكوت يملأ المكاان....
لا يوجد سوي قلبي الحزين..؟؟؟

الجمعة، 24 فبراير 2012

فضفضه

- حسه كل ما بتقدم لقدام خطوه...برجع لورا الف خطوه
- خليتني اصدق فعلا ان المستقبل ده اسوود...مع اني طول 
عمري متفائله مهما كانت الظروف
- زهقت من كتر الانتظار..
- حسه اني فعلا في حلم وهصحي علي كابوس اسمه الواقع
- بتستغل حبي ليك غلط وباسلوب يضايقني.....
- مش معني اني بحبك تاخد كل القرارات وبالنسبالي تكون اوامر
ومضطره اوافق عليها.....
- حاول تقدر اي حاجه بعملها مش تقلل منها وتسخف مني ..حاول 
علي الاقل تقتنع اني بعمل حاجه..
- بفكر في مليون حاجه وانت ولا حاسس واخر حسابتك هوا انا
مع ان في الوقت ده المفروض يكون اهمها هوا انا...
- برووووووووووود فظيع....
- نفسي اعمل حاجات كتيره اوي ودايما بتصدني..
- في الوقت ايلي بكون فيه بحضرلك في مفاجأه...تكون انت برضوا
بتحضرللي في كلام يقلب حياتي وينكد عليا...
- بتدور علي اي حاجه تقف في طريقنا وخلاص......هوا انت واخدني
غصب ...ولا محتاج تحس بقيمتي اكتر
 - المشكله بعد ده كله قال ايه مش واخد بالك...

الثلاثاء، 21 فبراير 2012

نجححححححححححححححت

باااااااااااركولي الحمد لله نجحت وجبت
امتياااااااااااااااااز.............تيرارارارارا
انا شطووووووووووره..

الثلاثاء، 14 فبراير 2012

happy valentine

كل سنه وانتوا طيبين...
وهابي فلانتين دااااااااي...
انا اصلا مبعترفش بالفلانتين ده...
عشان بالنسبالي كل الايام فلانتين...مش 
محتاجه يوم معين عشان يكون عيد الحب..
كل الايام حب...
اوعوا تصدقوا ايلي الخرف ايلي انا بقوله
ده بلا حب بلا نيله....؟؟ظ
المهم كل سنه وانتوا طيبين...
وكل عيد حب وانتوا في حب ان شاء الله

الأحد، 12 فبراير 2012

صمتي

صمتي لا يعني الهروب من الواقع
صمتي لا يعني عدم الاحساس بما حولي...
صمتي لا يعني ضعفي وقله حيلتي...
صمتي لا يعني انني تافهه ولا افقه شئ..
صمتي لا يعني الموافقه....
صمتي لا يعني الخوف....
صمتي لا يعني التجاهل...
ولكن.....
صمتي هو عزتي...
هو شموخي......
هو تاملي وتفكيري...
هو الحياه بالنسبه الي

الخميس، 9 فبراير 2012

الحقيقه

كل واحد فينا ليه نظارته الخاصه...كل واحد فينا شايف العالم
بعينيه هوا ...ومن نظرته هوا....بس يا تري بقي النظاره دي
بتخدعنا؟؟؟؟ ولا فعلا بتخلينا نشوف الناس علي حقيقتهم....؟؟
طب يا تري بتورينا الحقيقه كامله....؟؟؟؟
طب احنا عايزين نشوف فعلا الحقيقه كامله من جوانا...؟؟
ولا حابين بس اننا نشوف نص الحقيقه؟؟؟؟
وبنشوف ايلي احنا عايزين نشوفه وبس...ايلي علي مزاجنا وبس..
ولا بنعمل نفسنا اصلا مش شايفين...وفي الاخر نجيب العيب 
والغلط علي النظاره...لكن في الحقيقه الغلط من جوانا احنا...

الاثنين، 6 فبراير 2012

وااااااواااااا

اهئ اهئ اهئ اهئ...قلت اخرج وافك عن نفسي شويه
وسيبني بقه من الاكتتئاب...دي الاجازه هتخلص وانا
قاعده في البيت...لسه نازله ومبقاليش نص ساعه...
يقوم ايه يحصلي بقي.....؟؟؟؟؟؟دوست علي خشبه
ومخدتش بالي ان طالع منها مسمار....مسمار اخترق 
الجزمه ودخل في رجلي...انا معيطتش ولا صوتت
ولا عملت اي حاجه...شديته ورجلي اقعدت تخر دم 
كتيييييير...وبابا صمم اني لازم اخد حقنه تيتانوس..
كل ما اروح صيدليه محدش فاهم حاجه ولا عارف 
حاجه ولا حتي عارف يعملي اختبار حساسيه من
الحقنه الاول...قمت راحه علي المستشفي وخدت 
حقنتين..اهئ اهئ اهئ اهئ...يعني يوم ما اخرج اروح
ازور المستشفي واخد حقنه وارجع رجلي متعوره...؟؟
المشكله بقي اني مكنتش حسه بأي وجع خالص ساعتها...
لكن دلوقتي رجلي  وارمه وبتوجعني وماشيه بعرج....
ااااااااه يا رجلي....
جت الحزينه تفرح ملقتلهاش مطرح....المهم بقي انا طلعت بايه من ايلي حصل ده....؟؟؟
اني فعلا اكتشفت واتأكدت ان الصيادله دول اغبيه ...
ومبيفهموش حاجه...واحمد كان عنده حق لما قالي 
ان كليتي ده ملهالش اي لزمه واني هطلع بياعه في 
الاخر....مع احترامي لكل الصيادله...بس فعلا هما
فعلا بياعييييييييين وبس...

السبت، 4 فبراير 2012

ادعوا معايا

لا إله إلا الله العظيم الحليم لا إله إلا الله رب العرش العظيم لا إله إلا الله رب السموات ورب الأرض ورب العرش العظيم .

يا حي يا قيوم برحمتك أستغيث فأصلح لى شأنى كله و لا تكلنى إلى نفسي طرفة عين ولا أقل من هذا يا أرحم الراحمين لا إله إلا أنت .

يارب اغفر للمسلمين والمسلمات...الاحياء منهم والامواات

اللهم إني عبدك وابن عبدك وابن أمتك ناصيتي بيدك ماضٍ في حكمك عدلٌ في قضائك ، أسألك بكل اسمٍ هو لك سميت به نفسك أو أنزلته في كتابك أو علمته أحداً من خلقك أو استأثرت به في علم الغيب عندك أن تجعل القرآن ربيع قلبي ونور بصري وجلاء حزني و ذهاب همي ....

حسبي الله لا إله إلا هو عليه توكلت وهو رب العرش العظيم .

اللهم احرسني بعينيك التي لا تنام واكفني بركنك الذي لا يرام واحفظني بعزك الذي لا يُضام واكلأني في الليل وفي النهار وارحمني بقدرتك على ّ أنت ثقتي ورجائي يا كاشف الهم يا مُفرج الكرب يا مُجيب دعوة المُضطرين ....

اللهم اغفري لي وللمؤمنين يوم يقوم الحساب ..

اللهم اغفر لي ذنبي كله سره وعلانيته عمده وخطاه ماعلمت به وما لا اعلمه انك سميع مجيب الدعاء ...

اللهم ان لك صفوة تدخلهم الجنة من غير حساب ولا عقاب فاجعل  القارئ منهم ...

الخميس، 2 فبراير 2012

حداااااااد

يتقال عن ايلي بيحصل ده....؟؟؟؟؟
بس ربنا يصبر اهل الشهداء....
ويارب ارفع غضبك عننا واسترها معانا
وانصرنا علي الظالمين....مش عارفه ايه 
تاني هيحصل فينا....
عايزه اقولكوا علي سر كده؟...؟؟
انا اول مره في حياتي كنت انزل مظاهره
كان النهارده....ومن ورا بابا وماما ...ولو 
عرفوا مش عارفه هيعملوا فيا ايه...اصلهم 
فلول....بس والله قهرني منظر ابو الشهيد 
ايلي مات عندنا ومامته واخته...ربنا يصبرهم 
يارب ....شباب زي الورد بيروح مننا...وايلي 
بيقتل فيهم عايش حياته...ولا حاسس بحرقه
قلب اهاليهم...ربنا يصبرهم ياااااارب