فاكر زماان

حبيبي فاكر زي اليومين دول من 4 سنين...كان حلمنا ان الناس بس
تعرف اننا بنحب بعض...كان اكبر واحلي حلم في حياتي اننا نتخطب؟؟
عارف يوم خطوبتنا ده كان احلي يوم في حياتي... كنت خايفه وقلقانه
اوي وكنت مبسوطه اوي... كنت حسه ان الناس كلها بتبص عليا...وبتحسدني
عليك ...كنت مكسوفه اوي منك....وانت بتلبسني الدبله كانت ايدي بتترعش...
مكنتش مصدقه ان ربنا حققلي حلمي..وبقيت ليك....انا بحبك اوي...
معرفش حبيتك امتي ولا ازااي؟؟ بس فجأه لقيت نفسي بتشدلك؟؟؟
فجاه لقيتك شاغل كل تفكيري... غيرت كل حاجه فيا...غيرت كل حياتي
وتفكيري...خليتني بني أدمه تانيه...كنت دايما عايزني احسن واحده في
الدنيا...دايما بتشجعني ... وبتدفعني لقدام....انا بحمد ربنا عليك... وبدعي
ربنا في كل صلاه يخلينا لبعض .. ويهدينا .. ويحفظنا... نفسي تكون احسن
دكتور ف الدنيا.. وان شاء الله هتكون.. ربنا يخليك ليا وميحرمنيش منك ابدا

دنيا

بيصعب عليا اوي لما نكون صحاب اوي
وزي الاخوات ..وفجاه نبعد اوي عن بعض
عارفه ان في كل مرحله في حياتنا بنقابل ناس
ونحبهم اوي وفجأه يختفوا ويجي ناس تانيه
مكانهم... بس بايدنا نسأل علي بعض حتي لو
كل شهر مره... بس بقعد اسال عنهم ولما الاقي
مش فارق معاهم ولا حتي بيسالوا .. ببعد انا كمان
عارفه ان دي اخر سنه ف الكليه.. ومش هشوفهم
تاني وكل واحده هتتجوز في مكان غير التانيه
وهتنشغل في حياتها...نفسي الناس ايلي جمبي
ومعايا دلوقت... يفضلوا جمبي طول العمر.. نفضل
مع بعض ونسأل علي بعض.. الدنيا دي وحشه اوي
يااااارب متحرمنيش من ايلي بحبهم...

مش عارفه

انا حسه اني متلغبطه كده ومتغيره
حسه اني حزينه
حسه اني لوحدي مع اني مش لوحدي
حسه اني متضايقه ومخنوقه .. بس مش عارفه ليه؟؟؟
حسه اني مشاعري  اتغيرت تجاه ناس كتير
حسه بملل...حسه بخوف
حسه اني من غيرك حياتي ملهاش لزمه...

اجمل هديه

امتي بقي يجي اليوم ده....لما اشوفك
بتعلم ابننا ازاي يمشي .. وازاي يصلي
 وتقعد تحفظه قرأن...انت عارف انا
متأكده انك هتكون احلي واجمل واطيب
أب في الدنيا...هتعلم ولادنا كل حاجه حلوه
وهيأخدوا منك كل صفاتك الحلوه...نفسي
اجيب منك قطقوط صغير ..يكون شبهك
في كل حاجه.. نربيه كويس ونعلمه كويس
ونأخده في حضننا .. ونخليه احسن مننا
احنا الاتنين .. يااااااااااارب قرب اليوم
ده...يارب ابعتلي اجمل هديه....

مستغربه اوي نفسي

انا مش عارفه ايه ايلي حصلي فجأه كده
كل تفكيري اتغير كده فجأه...بقيت شايفه
كل حاجه بطريقه تانيه خالص غير ايلي
كنت شايفاها بيها قبل كده.. مش عارفه ده
كويس ولا لأ...انا عارفه كمان انك مستغربني
اوي..بس انا حسه اني مبسوطه كده دلوقتي
بس بعد كده كل ده هيأثر عليا...انا عمري ما
كنت بحب انزل الجامعه غير اني احضر سكاشني
واروح ومكنتش بحب اقعد مع صحابي.دلوقتي بقضي كل
وقتي معاهم عشان اخر سنه بقي ومش هشوفهم تاني.كان كل
اهتماماتي في الدنيا انت؟؟؟ حسه انك ف الفتره
الاخيره بقيت تضايق من حبي الزياده ليك؟؟وبقيت
تضايق مني لما اقلق عليك او تختفي شويه ومتكلمنيش
فحاولت اتغير واعمل نفسي مش قلقانه ومتضايقه
لما تقعد طول النهار مشغول عني..حسيتك متضايق
ان بقي ليا حاجات تانيه شغلاني وان حياتي
مش واقفه عليك...بقيت هاديه ومش بتعصب من حاجات
كانت بتعصبني قبل كده...انا بحاول اخليك متضايقش مني
بس الظاهر اني غلطانه ؟؟؟ طلعت بتحبني بجناني وبعصبيتي
وبكل عيوبي و اتحرق دمك اوي لما طول النهار مسالتش عني
ولقيتني بقولك انا يا حبيبي مش زعلانه عارفه انك طول النهار
مش فاضي ومشغول .. ما انت اكيد لو كنت فاضي هتكلمني؟؟؟
بس والله بحبك

حب عمري

 يا من ملكت قلبي و عقلي و تفكيري ! أحبك كثيرا .. احبك كما أنت .. احبك بجنونك .. و بتعقلك .. و بكلامك .. و بصمتك .. و بغضبك .. و برضاك .. و برجولتك و كبريائك .....!

اعشق خوفك عليّ .. اعشق غيرتك عليّ .....

كلما تذكرتك .. كلما زاد شوقي اليك ...

و كلما زاد شوقي اليك .. احببتك اكثر و اكثر !!

احيانا اتمني ان تكون بعيدا لأشتاق اليك و تشتاق اليّ و اعرف كم تحبني ؟؟!!

و احيانا اتمني لو انك تشاركني كل لحظة في حياتي

اجلس وحدي كثيراا و اتخيل انني معك .. اشاركك احزانك قبل افراحك .. اشاركك كل لحظة في حياتك .. كم احتاج لك لتضمني ,,,, لأشعر بالأمان .....!

احلم باليوم الذي سيعلم فيه الجميع انك لي و انني لك !! في هذا اليوم ,, لا احد يستطيع ان يأخذك مني ! اتخيل نفسي وقتها ! كم سأكون سعيدة !!!

سأكون لك وحدك .. سأوهب لك حياتي !!

كم اتمني ان اصرخ و اشاور عليك امام الجميع و اقول هذا هو حبيبي .. هذا هو من ملك قلبي

مجروحه اوي منك .. فوق ما تتصور وفوق ما كنت انا اتصور
 يعني ايلي يحب حد كده ..ده يستاهل كده.....
يعني ايلي يهتم بحد الاهتمام ده كله... يكون مقابل ده الاهمال
انا مضايقني اكتر انك مش حاسس انك غلطت في حقي ...
ولا حاسس حتي ان ليا حق ازعل....هوا وانا رخيصه اوي كده
بالنسبه لك... هو انا مستاهلش منك تهتم بيا....
مستاهلش  منك تحس بيا شويه....مستاهلش تحبني
اهو انا الغلط مني يعني... هوا ده جزاتي عشان بحبك شويه زياده
والله العظيم انت بالنسبالي حياتي كلها .. مبقدرش ابعد عنك يوم
مبقدرش اقعد كام ساعه مسمعش صوتك....

عارف نفسي في ايه؟؟؟؟

نفسي ربنا يهديني ويهديك
نفسي نقرب من ربنا اكتر
نفسي نراعي ربنا في كل تصرفاتنا
نفسي تحبني اوي زي ما بحبك
نفسي نفضل نحب بعض كده علي طول
نفسي تاخد بالك مني اوي
نفسي متخلنيش انام في يوم زعلانه
نفسي تاخدني في حضنك لما اكون محتجاك اوي
نفسي اكون اهم حد في حياتك
نفسي ربنا يخلينا لبعض علي طول
نفسي نتجوز بقي ؟؟؟
نفسي اصلي معاك الفجر
نفسي نقعد نقرأ قرأن سوا

لالالالا انا كده مش طبيعيه

طب والله انا نفسي مستغربه نفسي؟؟؟؟

انا بقرأ قصه لاحسان عبد القدوس يا

جدعااان....انا فعلا شكلي اتغيرت...

بقرأ وكمان عملت مدونه...اي نعم انا 

مش عارفه انا عملاها ليه؟؟؟ بس 

برضوا عملتها وبكتب فيها... انا عارفه 

طبعا ان محدش هيقرا الهبل ايلي بكتبه..

هوا حد فاضي يقرأ هبله لما هيقرا

هبل غيره؟؟؟؟ بس انا والله مبسوطه

بحاول اغير من نفسي...اصل انا عارفاك 

بتحب البنات المثقفه وعارفه انك مستغرب

اني بدأت املا دماغي الفاضيه ديه... و

عارفه كمان انك بتموووت ف البنات 

الثورانجيه...بس لحد كده وكفايه ؟؟ انا حاولت 

اكون ثورانجيه وفشلت فشل زريييع....

انت عارف من كام يوم وانا علي تويتر كانوا

قاعدين يتكلموا في موضوع ويقولوا رأيهم

قلت طب وايه يعني ما اعمل زيهم... قمت كاتبه

كومنت بس مسحته وقعدت اضحك علي نفسي

اصل حسيت نفسي بضحك علي روحي...

البطيخه

جواز ده عامل زي البطيخه؟؟؟ يا تطلع حمرا.. ياتطلع قرعه....او ممكن تطلع حمرا بي دلعه
وملهاش طعم...انت وحظك بقي..بس نعمل ايه
شر لابد منه ..او بالمعني الاصح سنه الحياه
وهوا غالبا بتتطلع قرعه يعني؟؟؟؟ بس الشاطر
بقي ايلي لة بطيخته قرعه يحاول يتأقلم معاها
يعني يدوقها...ما يمكن تكون قرعه بس مسكره..
اصل مفيش حد فينا مفيهوش عيوب..بس الواحد
لازم يحاول يبسط نفسه...اصل احنا يعني مش
هنتعيش ميت مره دي مره واحده...يعني يحاول
يدور علي مميزات ايلي قدامه ..عشان ايلي قدامه
يتغاضي عن عيوبه...يعني مثلا ما انا وخطيبي
كل حاجه فينا مختلفه ..انا عصبيه ومجنونه و
دماغي فاضيه... وهوا عاقل وهادي ودماغه
مش فاضيه؟؟؟بس والله بحسه بيكملني ..او يمكن

عشان بحبه وعايزه اكون مبسوطه معاه ببص
للحاجات الحلوه ايلي فيه

الله يخرب بيت الحب وسنينه

والله انا امبارح كنت زعلانه منك اوي

طبعا انت عارف ليه؟؟؟؟؟؟ مش لازم 

اجي اقولك يعني اهتم بيه شويه .....

انا بتقهر اوي والله لما حس ان احنا

بعدنا شويه عن بعض... بخاااف اوي 

عارفه انك بتحبني اوي.. بس ساعات

ببقي محتاجاك اوي.. محتاجه اتكلم معاك

محتاجه حتي لو هقعد ارغي في اي 

كلام فاضي....بس احس ان في حد لما 

اعوزه هلاقيه ..انا اصلا كنت ناويه 

اقعد كام يوم كده ومش اعبرك ولا ارد

عليك... بس طبعا مبقدرش ؟؟ اخري كام

ساعه واول ما اشوف رقمك علي الموبيل

برد بسرعه.. واول ما تقولي وحشتيني 

انسي كل ايلي حصل واقولك وانا كمان

بحبك اوي

انا مش مصدقه ان هيجي يوم واقول فرحي النهارده.......عارف يعني ايه؟؟؟ يعني هتجوزك...؟؟ يعني هكون ليك لوحدك....يعني بحبك اوي... قد ايه كنت مستنيه اليوم ده.....اليوم ايلي هكون ليه...
عارفه اني هكون خايفه وقلقانه....
بس منكرش اني هكون اسعد واحده في الدنيا....ده انا ياما حلمت باليوم ده....
خلاص هكون معاك وجمبك... هبقي مبسوطه اوي وانا لابسه الفستان الابيض....
وكل الناس بتبصلي وبتحسني عليك...وكل البنات ايلي عنيهم عليك هيموتوا من الغيره...اوعدك اني هكون الزوجه والام ايلي اتمنيتها... واوعدك عمري ما هخيب ظنك..
اوعدك هفضل احبك طول عمري

حرقه دم

انا بجد مضايقه النهارده لا فعلا محرووووق دم

كل واحده اتجوزت زي ما يكون زادت حته ولا

حاجه نازله تحرق دم ايلي حواليها ده ايه القرف 

ده  طب والله انا ايلي انشك في لساني ايه ايلي 

خلاني اقولهم مبروك اصلا كل واحده تقولها 

مبروك تبصلك من فوق لتحت وتقول عقبالك 

وتودي وشها الناحيه التانيه وانا اصلا اكتر

كلمه بكرهها في حياتي هيا كلمه عقبالك

وايلي حرق دمي اكتر واحده اول ما شافتني

مسكت ايدي الشمال وقالتلي انا قلت هاجي الاقي 

الدبله في الايد التانيه  ።።طب واحده زي دي

انا ارد عليها اقوول ايه؟؟؟ اقول انتي مال اهلك